stærðfræðikennari

Auglýst er eftir einstaklingi til að kenna aukatíma í stærðfræði. Viðkomandi þarf að hafa ótakmarkaða þolinmæði og helst að vera laus snemma á morgnana þar sem viðfangsefnið er viðráðanlegast á þeim tíma sólarhringsins!
Skráði mig í viðskiptafræði með áherslu á stjórnun og stefnumótun í dag. Flestir áfangarnir mjög spennandi, eins og stefnumótun fyrirtækja og verkefnastjórnun, flest kennt á ensku. Þó leynast þar þrír áfangar sem ég er nú þegar farin að fá matraðir yfir; rekstrarhagfræði 1, inngangur að fjárhagsbókhaldi sem meðal annars inniheldur tvíhliða bókhald og kennitöluútreikninga og svo er fjármál 1. Það liggur ljóst fyrir að það verður ekkert sem heitir félagslíf næsta vetur nema bingo fyrsta föstudag í mánuði.

Athugasemdir

[móðir sambýlings (IP-tala skráð) 1.4.2008 kl. 11:20]

Ég var að því komin að hringja á lögguna í Montpellier til að láta fjarlægja þig af heimili ykkar sonar míns vegna skyndibilunar þegar ég áttaði mig á því hvaða dagur væri í dag! Gott gabb!

[madre (IP-tala skráð) 1.4.2008 kl. 17:05]

Ég verð því miður að leiðrétta misskilning móður sambýlings því hér er hreint ekkert gabb á ferðinni heldur heilagur sannleikur...

En viðskiptafræðilegasinnaður mannfræðingur er án efa skemmtilega klikkuð blanda.  Áfram Hildur og ekki opna dyrnar ef löggan bankar uppá!

[Þorgeir Ólafsson (IP-tala skráð) 1.4.2008 kl. 18:07]

Það er freistandi að leggja orð í þennan belg. Þegar ég var ungur daðraði ég við þá hugmynd að leggja fyrir mig lögfræði. Ekki til að starfa við innheimtur og brask heldur til að bjarga heiminum. Hvorugt gekk eftir. Ef Hildi gengur það til með viðskiptafræðinni að bjarga heiminum obboðlítið, t.d. með því að bæta viðskiptahætti með einhverjum hætti, einhversstaðar, þá hefur tilgangurinn helgað meðalið. Segðu löggunni þetta.

Þorgeir 

[móðir sambýlings (IP-tala skráð) 2.4.2008 kl. 10:34]

Hildur mín kær! Auðvitað er almennt ekkert fyndið að þú skulir ætla að læra viðskiptafræði - ég hef bara svona gamaldags, sósíalískt skopskyn og er auk þess vonlaus sjálf í öllu sem snertir peninga. Til hamingju með ákvörðunina, þú lætur örugglega gott af þér leiða hvað svo sem þú tekur þér fyrir hendur.

Já, Þorgeir, ég innritaði mig reyndar í lögfræði um tvítugt af nákvæmlega sömu hvötum og þú nefnir, en mætti hins vegar aldrei í fyrsta tímann. Væri kannski annars búin að bjarga heiminum pínulítið, hver veit?